യു. ഡി. എഫ്. നേതാക്കളുടെ പത്രസമ്മേളനം ഒരുകാര്യം വ്യക്തമാക്കി. അവിടെ എന്തോ ചീഞ്ഞുനാറുകയാണെന്നും ആ ചീഞ്ഞുനാറ്റം പുറത്തുകൊണ്ടുവരുന്നവരെ കൈകാര്യം ചെയ്യാന്‍ യു. ഡി. എഫ്. തീരുമാനിച്ചിരിക്കുകയാണെന്നും വ്യക്തമായി. ഉമ്മന്‍ ചാണ്ടി നിര്‍ദ്ദോഷിയല്ലെങ്കില്‍ എന്തുകൊണ്ട് കഴിഞ്ഞ അഞ്ചു കൊല്ലമായിട്ടും കേസെടുത്തില്ലെന്നാണ് ചോദ്യം. ചോദ്യം കേട്ടാല്‍തോന്നുക രാഷ്ട്രീയ എതിരാളികള്‍ക്കെതിരെ കേസെടുക്കുകമാത്രമാണ് എല്‍. ഡി. എഫിന്റെ പ്രവര്‍ത്തനപരിപാടിയെന്നാണ്.
ഉമ്മന്‍ ചാണ്ടിക്കെതിരായ പരാതി എല്‍. ഡി. എഫിന്റേതല്ല. ഐസ്‌ക്രീം കേസ് എല്‍. ഡി. എഫ്. അല്ല രണ്ടാമതും ചര്‍ച്ചാവിഷയമാക്കിയത്. ടി. എച്ച് മുസ്തഫയും പഴയ ധനകാര്യ സെക്രട്ടറിയും കോടതിയില്‍ നല്കിയ സത്യവാങ്മൂലത്തിലാണ് ഉമ്മന്‍ ചാണ്ടി ആരോപിതനാവുന്നത്. അതിന്റെ മെറിറ്റും ഡീ മെറിറ്റും കോടതിയാണ് പരിശോധിക്കേണ്ടത്. പക്ഷേ, കോണ്‍ഗ്രസ്സിന്റെ വക്താവും നേതാവുമൊക്കെയായ മുസ്തഫ ഉമ്മന്‍ ചാണ്ടിക്കെതിരെ സത്യവാങ്മൂലം നല്കുമ്പോള്‍ അത് കേട്ടില്ലെന്ന് കരുതിയിരിക്കുവാന്‍ എല്‍. ഡി. എഫിനാവുകയില്ല.
റഊഫുമായി കുഞ്ഞാലിക്കുട്ടിക്കുള്ള അഭിപ്രായവ്യത്യാസം പൊട്ടിയൊഴുകാറായ പശ്ചാത്തലത്തില്‍ കുഞ്ഞാലിക്കുട്ടിതന്നെയാണ് വിഷയം രണ്ടാമതും മാധ്യമശ്രദ്ധയില്‍ കൊണ്ടുവന്നത്. ഈ പ്രശ്‌നം പുറത്തുകൊണ്ടുവന്നത് എം. കെ. മുനീറിന്റെ സ്വന്തം ചാനലായ ഇന്ത്യാവിഷനാണ്. കോതമംഗലം കേസിലെമൊഴിയും പുറത്തുവന്നിട്ടുണ്ട്. കുഞ്ഞാലിക്കുട്ടിയും ഒരുമുന്‍കോണ്‍ഗ്രസ്മന്ത്രിയുമായ എസ്. കൃഷ്ണകുമാറും തന്നെ പീഡനത്തചിനിരയാക്കിയെന്ന് കോതമംഗലം പെണ്‍കുട്ടി ആദ്യ മൊഴിനല്കിയെന്ന വസ്തുതയാണ് പുറത്ത് വന്നിരിക്കുന്നത്. ഇതിലൊന്നും ഇടതുപക്ഷജനാധിപത്യമുന്നണി ഒരിടപെടലും നടത്തിയിട്ടില്ല. റഊഫിനെ വിലയ്‌ക്കെടുക്കാനാവാത്തതരത്തില്‍ തെളിവുകള്‍ പോലീസിനും ചാനലുകള്‍ക്കും ലഭിച്ചുകഴിഞ്ഞ പശ്ചാത്തലത്തിലാണ് ു. ഡി. എഫ്. നേതാക്കളുടെ ആക്രോശമുണ്ടായിരിക്കുന്നത്.
ഇടമലയാര്‍കേസില്‍ ബാലകൃഷ്ണപിള്ളയെ എല്‍. ഡി. എഫ്. ബലിയാടാക്കിയെന്ന് ഉമ്മന്‍ചാണ്ടി കുറ്റപ്പെടുത്തുന്നുണ്ട്. സുപ്രീം കോടതി ശിക്ഷ വിധിച്ചതിന് എല്‍. ഡി. എഫ്. എങ്ങിനെയാണ് ഉത്തരവാദിത്വം വഹിക്കുക? ഇടമലയാര്‍കേസ് മാത്രമല്ല, വേറെയും കേസുകളും കോടതിക്കുമുന്നിലുണ്ട്. പീഡിതന്റെ വേഷമണിയാനും സഹതാപമാര്‍ജിക്കാനുമുള്ള ലജ്ജാരഹിതമായ നിലപാടാണ് യു. ഡി. എഫിന്റേത്.
--
regards
cp
No comments:
Post a Comment